shachyen ga

KACHIN ONLINE MINISTRY

Shachyen Ga

Tsawra hkungga ai nu wa hpung masha ni yawng hpe ngwi pyaw simsa nga mu ga ngu, Hkristu a amying ningsang hta, shakram dat nngai. K.K a chyeju hte n dai Kachin online ministry ngu ai hpe hpaw hpang dat lu ai majaw mung Karai Kasang a chyeju hpe nachying shakawn nngai. Bai nna, lam magup hku n gun jaw, garum shingtau la nga ai myitsu ni yawng hpe mung chyeju dum nngai.

Ndai online ministry a matu myit makun ai gaw na sai. Prat hte shingrau nna Karai kasang a mungga ni hpe ginlen shalai mayu ai myit katu pru wa ai majaw re. Rai tim Myen mungdan a Internet function n hkrak ai majaw, ya she, ya yang, Japan kaw nga ai, tsawra ai kanau Hpt. Sara Lahpai Htoi Naw web/blog lit la hpaw ginlen ya ai hte hkrang lu shapraw wa ai re.

Yaw shada ai lam gaw,

(1)
Ngai ka ginlen ai laika ngau, laika buk ni hpe Internet online hta hti la mayu ai hpu nau ni yawng hti la lu nna, asak hte hpring tsup ai Hkristan asak hkrung lam hpe lu gaw gap la lu na matu re.

(2)
Karai Mungga kadun ni hpe madat n gun la mayu ai hpu nau ni, rau ang ai aten  kadun laman hta madat let, n gun la lu na matu re.
(3)
Makam masham lam hte seng nna chye na la mayu ai lam ni hpe laika hte ka nna, san la lu na matu, re. Ga san ni hpe online kaw sha bai ka nna htai da ya na re.
(4)
Mungkan ting hta nga ai Chyumrum W.P sha ni hte makam masham lam Karai masa lam ni hpe shada tsun jahta ginlen hkat lu na matu yaw shada ai re.

Yawng hpe ginchyum nna tsun ga nga yang, Karai Kasang a mungga ginlen shalai ai lam hta lakung lakap kaji sha pyi tai u ga ngu nna, Krai Kasang jaw ai shingran hpe akyu hpyi ap nawng ai hte, hkrang shapraw galaw gun hpai ai lam rai mali ai. Ra rawng ai lam ni nga wa yang mung mara raw dat ya marit. Grau grau tangdu ai, hkrak ai, lamang rai lu na matu mung hpaji jaw garum shingtau la marit. Akyu hpyi garum marit.
Karai Kasang a amying ningsang hpe tut nawng shagrau sha a nga ga!
.
Rev. Dr. Lahpai Awng Li
Sharin Sara, MIT Insein, Yangon.
(B.Sc (Q), M.Div , D
.Min , Ph.D)